昨日拍賣嘅山頂聶歌信山道地皮，成交價104億元，聽聞係由包括南豐嘅財團投得，雖然成交價只係市場預測嘅中位數，但講緊每呎地價3.2萬元，可見發展商對豪宅市道真係信心十足！
中港股市再展升浪
滬綜指話咁快重上2,600點樓上，實在令人喜出望外，昨日滬深兩市總成交增至2,352億元人民幣，乃自四月中旬跌浪開始以來嘅新高。咁嘅局面，話唔係有春江水暖鴨先知，真係好難令人信服。阿莊相信，過去數月內地A股市場尋底已經完成，未來A股將會重現升勢，港股亦會跟隨反覆向上，特別係眼見近期有信心入市追貨嘅股民唔多，更加令阿莊相信，後市會繼續走高，故短期每逢市況回吐，便要睇位跟進，免得錯失升浪。
由於大市方向漸明，唔少二三線股亦把握機會開車。阿莊持有嘅中航科工（02357）昨日急彈逾8%，收報2.95元。另一持股嘅香港中旅（00308）喺本月中獲母公司增持過後，股價亦見回升，昨日收報1.86元。呢兩隻股，基本因素正不斷改善，所以阿莊一直唔忍心止蝕。至於本月買入嘅億和（00838），近日股價回軟，相信要等八月底、九月初公司宣布中期業績前後，便可見真章。
本周初阿莊推介嘅威勝集團（03393）昨日高開，遂入場以平均價每股5.7元追入8萬股，果然捉正升浪，全日高位曾見6.17元，收報6.14元，升10.4%。據聞有關新能源產業嘅「十二．五」規劃，將把智能電網行業納入其中，消息為威勝提供炒作藉口，短炒會睇位食胡。
蒙牛乳業前途光明
執筆期間，傳來蒙牛乳業（02319）有股東配股嘅消息，蒙牛運作已從毒奶事件全面恢復過來，加上泊得中糧集團這個大碼頭，前途光明，只係價位較大，較合中長線投資者。
回說A股回升，其實復星國際（00656）應該受益不淺，皆因公司投資於多家A股公司，且尚有三、四個投資項目正計劃下半年喺A股上市。事實上，復星嘅投資涉及醫藥、房地產、鋼鐵、廣告服務、零售等多個領域，過去投資眼光被市場認同，隨着A股市場氣氛回暖，相信其整體資產價值亦會水漲船高。
喺預示下半年圍繞公司嘅消息流正面之下，五月以來嘅反彈浪可延續，吼6元邊或樓下睇位上車，目標試破今年高位6.62元，穿5.5元止蝕。
戰報
威勝集團（03393）
阿莊於本周一指威勝發力，昨日其股價一度最高升上6.17元，較推介當日低位5.47元升12.7%。
永保林業（00723）
積奇昨日推介永保林業，其潛在爆發力果然驚人，最高見0.495元，以低位0.44元計，單日升12.5%。