話就話個市連升六日，但志強同大部分炒鬼一樣，覺得好難搵食，資金集中買重磅股，又唔敢高追上車，但係股仔又唔見開車。之不過，其實唔少股仔經已熱身，目前只欠資金流入，先列入觀察類別，因為機會係留畀有準備的人。
國際精密（00929）主要業務為製造及銷售應用於硬盤驅動器（HDD）、液壓設備、汽車零件之精密金屬零件。截至去年底止，全年業績大幅倒退，僅錄得1,258.7萬元純利，按年大幅下跌79.4%，每股盈利1.66仙。
其實去年內地汽車銷量勁升，與汽車生產有關的零件及配套等生意照道理亦步入復甦階段，但國際精密業績偏偏大倒退，主因係金融海嘯發生前，公司以高價買入原材料，以及折舊費用增加，搞到份業績走晒樣。
幸而國際精密的噩夢終於過去，今年業績大翻身可期，雖然公司最快要下個月先正式公布，但有消息指業績公布前，或者會先發盈喜，難怪股價昨日急升一成，逼近全年高位，短線目標1元，跌穿0.8元止蝕。
國際精密（00929） 目標價：1.0元 止蝕價：0.8元