筆者曾經喺郭生旗下嘅新意網（08008）做過，當時已認識帶領公司嘅許浩明。佢係一個風趣、幽默嘅管理層，仲記得當時佢着嗰套粉紅色Golf型格戰衣，實在「型到爆燈」。無番咁上下功力，唔係咁易carry得起。再見番許生，已經係喺香港資源（02882）嘅全年業績公布會上，原來佢已經過檔成為佢哋其中一位重要管理層。佢最強嘅梗係佢最勁揪嘅M&A同埋投資者關係啦！望一望香港資源，同○九年比較，今年佢哋嘅毛利增加咗527倍，最主要梗係因為佢收買咗金至尊業務，成為咗佢哋新動力來源。
「祖國愛黃金，揸金最有心」係人都知啦，有質量保證同埋企業價值鏈（value chain）嘅全方位優勢，成為不少企業維持佢哋喺21世紀嘅優勢立腳點，2882嚟緊梗係要不斷擴大佢哋版圖，咁樣先至可以立於一個不敗之地。如果咁睇，許生又要有排辛苦，冇得瀟灑。