講番位處豪宅群的聶歌信山道地皮,自從四叔天價掃白加道地皮自用,豪宅地都以麵粉貴過麵包價錢拍板,幾家測量師行愈估愈樂觀,預測成交價介乎80億至115億元,呎價介乎2.5萬到3.5萬元。
樓市未到瘋狂程度
有趣的是,儘管今日豪宅地價完全脫離普羅市民及打工仔可負擔甚至幻想擁有的範圍,但地產股估值卻未算十分「嚇人」,睇番恒生地產股指數,歷史市帳率是介乎0.54至2.15倍,突破兩倍高位的兩次,分別在九七年中以及○七年十一月出現,估都估唔到現時不過1.24倍,只高過歷史平均的1.19倍少少,這意味着,當大家以為樓市好瘋狂,其實離真正癲嘅日子,仲有一段相當長嘅距離。
講番個市,上周五港股偷步透支歐美股市可能再升的因素,結果港股周一先來一個反高潮,恒指高開低收,即月期指更掉頭炒低水,預示連升五日後,大市需要抖一抖氣。綜觀外圍氣氛好咗,A股亦然,美電及拆息反映再有資金流入的情況,相信今浪調整好快完成,大市破21,000點只係時間問題。
個股方面,弱咗一段時間的中信資源(01205),藉分拆中信大錳於主板上市的消息而急升。但相對上,藥業股似乎有更多故事配合炒作,尋日多隻基金至愛都見有追捧,廣州藥業(00874)升0.55元,報6.73元。
較高位累跌近四成
廣藥製銷中成藥、銷售及進出口中西藥及醫療器材,年初祖國落實醫療改革,市場熱錢不斷湧入醫藥股,廣藥本身有10種藥列入國家基本醫藥目錄,隨着內地對藥品需求增加,以及可以全國性銷售名單內藥物的好處,廣藥五月初股價最高曾見9.44元,其後才因為歐債危機及發改委擔心藥品暴利,研究限價的消息打擊,早前回落去到最低5.74元,較高位累積跌近四成。
股價一上一落,但廣藥基本因素無大變動,只係反映市場情緒的轉變,尋日睇番彭博資訊,綜合大行預測盈利和三個月前比較,無跌之餘還有輕微調升,未來兩年盈利增長估計達兩成八及兩成一,預測市盈率16.5倍,頗吸引(PEG 0.6倍,也比醫藥股平均27.8倍低)。而且低位成交增加,大戶低位收集的舉動明顯,不妨留意。