內地股市表現亦確實比想像中強，滬綜指昨日曾高見2,589點，收報2,588點，升0.65%。老實講，滬綜指喺2,500點水平嘅阻力非輕，在沒有具體利好政策出台下，近周反彈至該水平，承接力已算係勝於預期。
本港國企、紅籌反彈力度亦不俗，繼續順勢側重中資股係無可厚非。嚟緊中資股主力炒企業業績消息，只要A股走勢配合，國指重越250日線12,134點指日可待。
講到國企股，農行（01288）昨日曾高見3.54元，收報3.5元，已較招股價升9.3%，實乃異數。另阿莊喺4.53元買入嘅第一拖拉機（00038），終於不負所望，昨日曾升至5.29元，收報5.17元，且連續兩個交易日現大成交，料升勢未完，會繼續坐順風車。
此外，阿莊手持嘅中芯國際（00981），自從公司宣布發新股以來，股價未見有似樣反彈，昨日更跌至0.49元收市，好在阿莊持貨只係用年初炒中芯嘅利潤購入，就當係免本，偏唔信兩岸大孖沙埋位都打唔掂呢鋪翻身戰，一於繼續靜觀其變。
有關「十二．五規劃」嘅報道開始出現，最近輪到有色金屬行業，聽聞行業草案已定，主調係繼續嚴控產能，並加快企業重組，提高企業國際競爭力，即係話大方向未有改變，最終局面只會係強者愈強，故選擇呢類股份，記得抓緊一個宗旨，就係唔大唔買。
快將變身資源股
本身從事物業發展及投資嘅保利達資產（00208），去年賺8.8億元，大部分來自澳門東方明珠地段嘅發展項目─海天居（公司持股八成）嘅最後收益分派。由於公司已成功預售另一澳門樓盤──氹仔海茵怡居（公司持股58%）所有住宅單位，相關利潤將於今年上半年入帳。
除此之外，近年公司的另一大舉措，乃藉最終控股股東喺石油領域嘅多年經驗，開始涉足國際油氣市場。
去年底公司達成首宗油氣項目協議，就收購喺哈薩克斯坦從事碳氫化合物礦床生產及勘探石油業務嘅Caspi Neft TME，訂立認購期權，今年四月公司已行使有關選擇權，斥1億美元悉購Caspi Neft TME，昨見公司已發出有關嘅交易通函，如一切順利，保利達將變身成資源股。
再看走勢，保利達嘅股價喺1.2元水平已經橫行逾月，近周股價有異樣，昨日收市報1.4元，上升3.7%，成交金額2,046萬元。反正公司搞緊大Project，不妨順勢跟進，短線目標上試1.6元，10日線支持在1.31元。
戰報
英皇鐘錶珠寶（00887）
阿莊上周五推介英皇鐘錶，當日低位0.54元，受盈喜帶動，昨日一度升上0.58元，升幅達7.4%。
+7.4%
中信資源（01205）
冼金基昨日推介的中信資源，股價急升並高見1.76元，以低位1.64元計，單日升幅達7.3%。
+7.3%