慶祝落成二十五周年

滙豐專登搞咗個展覽揭幕儀式，太子見到滙豐香港區總裁Mark哥（馬凱博）之外，仲見到滙豐銀行前主席施德論，佢哋一齊主持呢個揭幕禮。點解會請埋施德論出席呢？原來佢老哥就係當年負責總行大廈興建計劃嘅總舵手，佢仲喺會上分享當年嘅點點滴滴。滙豐總行喺香港建築群仍有一定地位，施德論認為主要原因包括，大廈處於一個空曠嘅空間，前面就係皇后像廣場，啲人好易望到滙豐總行。

海外製配件 運港裝嵌

當年興建呢座大廈，施德論話挑戰係來自設計隊伍，因為所有配件都係海外製造，跟住運嚟香港，然後再將配件裝嵌，所以好講求精確度。佢話有份參與呢個項目嘅人都覺得好自豪。而Mark哥喺儀式上致辭話，自己年輕時揹着背囊嚟香港，第一眼睇到滙豐大廈，印象已好深刻。