踏入七月，史提芬加入好友行列，睇番客觀因素，歐債危機開始無人提，美股恐慌指數（VIX）經已返到五月初水平。或者中國股市依然為港股馬首是瞻，但內地樓市宏調措施，面對水災及出口放緩兩大考驗，未必急於再出新招，上星期市場就傳房產稅最快要兩年後才會推出。另外，人行為配合第三、四季幾間內銀的大型集資活動，再開水喉機會唔細，睇番A股春江鴨已蠢蠢欲動，短短三星期由低位升一成一，明顯轉勢，結合一眾利好因素，筆者相信港股今浪應該無咁短癮，手上有貨者不妨畀啲耐性靜候收成來臨。
光銀上市珠玉在前
美股上周五低開高收，今日港股挑戰21,000點機會好大，近期內地金融股走勢悅目，光大控股（00165）上周五以大成交挑戰20元水平，報收19.96元，旗下光大銀行進入招股上市程序，消息指，光銀準備發行不超過70億股，以預期招股價3.03至3.21元人民幣計，集資額介乎180億至210億元人民幣。
如非善忘，去年七月光大證券A股掛牌，因為多年投資獲得股本化的機會，推動光控估值，其股價由消息公布時的16元水平，直奔25.55元，珠玉在前，今次光銀分拆的消息，難免又惹來偷步買盤推高股價。
今次發行A股數目等於擴大後股本一成五，上市後光控揸5.26%計，以上限定價嘅話，光銀值1,500億元人民幣，光控手上股份價值79億元人民幣，或相當於89.7億港元，等於本身市值兩成八左右，照計應該及唔上去年光證上市推高手上資產值的威力咁大。連同手上33%的光大證券股權市值209億元，兩大核心資產合計298.7億元，目前光控市值318億港元，無折讓反而有幾巴仙溢價，相對一般控股上市公司，至少有兩至三成折讓，筆者有啲睇唔慣。
受惠A股走出谷底
這個情況，同A股弱過藥煲不無關係，年初至今，光證累積跌幅近四成，假如金融產業差不多去到行業谷底（筆者也相信這一點），目前溢價可以接受，況且買A50基金（02823）都經常有溢價出現，如果賭光銀分拆，賭A股交易佣金見底，目前光控應該仲有水位可跟。
展望未來，隨着光控變成投資控股公司身份，盈利回報再非重要指標，十七倍抑或十四倍預期市盈率，參考意義唔大，唯獨是股息回報偏低，是缺點之一，姑勿論點，在種種條件配合下，押注光控，三至六個月內，見23至25元的機會應該唔細。