受惠內地股市回揚，港股氣氛亦有改善，恒指上周五收報20,815點，成交急增至701億元，真係似模似樣。睇圖表走勢，恒指250日線及五月份高位分別處於20,975點及20,957點，可見跟滬綜指一樣，恒指正處關鍵時刻，若能成功重上21,000點樓上，勢必引發更多補倉盤出現。
上周五又有市區靚地被成功勾出，地皮位於九龍塘義德道一號，地盤面積2,399平方米，指定作私人住宅用途。睇地段，都知又係起豪宅，豪宅業主自然高興，但對於增加一般用家住宅市場供應，則沒有多大幫助。
農業銀行（01288）掛牌以來力守招股價3.2元，上周四、五終見真章，周五高位曾見3.5元，收報3.48元，升5.46%，成交高達36億元。
觸發農行股價升勢，主要係港交所（00388）披露權益資料顯示，農行前周五掛牌當日，美國大型基金公司資本集團旗下資本研究和管理公司，斥資126億元買入農行約39.3億股H股，相等於12.79%股權。惟農行首日掛牌全日成交才104億元，故有市場人士估計，該批貨係透過承銷商行使15%額外配售權認購得來，實際情況則有待公司公布。有大孖沙投下信心一票，股價又出咗個「鐵底」，難怪炒家放心掃貨。
講開農行，聽聞籌備上市多年、中國第六大股份制商業銀行的光大銀行，亦想食住農行條水，喺八月登陸A股市場，估計集資額超過100億元。一時間內銀股供應大增，市場能否消化，值得大家留意。
英皇鐘錶盈利躍進
咁啱得咁蹺，上周五見報推介嘅英皇鐘錶（00887），喺收市後發出盈喜，預計今年上半年中期業績溢利同比將錄得顯著增長，主要受惠零售網絡擴張及營業額增加，但公司同時披露，中期溢利可能受到金融工具公平值變動之影響。無論如何，撇除非現金特殊項目影響，公司核心盈利大躍進係好消息，估值更顯吸引力。
憧憬智能電網發展
異動股方面，專做電子能源計量設備嘅威勝集團（03393），上周五股價急升逾7%，收報5.68元。憧憬國家智能電網的發展，過去兩個月威勝股價反覆向上，近周喺5.2至5.3元水平盤整後，上周五升勢重現，睇嚟好戲在後頭，目標6.3元，穿5.2元止蝕。
戰報
恒盛地產（00845）
冼金基上周五指恒盛為抵買內房股，當日一度升過上2.7元，以低位2.48元計，單日升幅達8.8%。
中國龍工（03339）
史提芬本月二十日推介中國龍工，上周五一度升過上5.69元，較推介當日低位5.26元，累升逾8%。