有物業代理統計顯示，今年上半年，內地客買香港樓嘅金額比例達到10.8%，其中佔一手樓金額比例更高達22%，這解釋到為何新樓開售價仍可持續高企。新樓價格已去到非普通本地用家所能承擔嘅水平，難怪本地用家要將目光愈放愈遠，就連新界樓仔價格都去番九七水平。
按過往經驗，樓市炒到入新界，升市已處強弩之末。不過，如今香港樓市多咗祖國同胞參與，內地客掃完香港樓，可以丟空幾年唔收租都冇緊要，香港人慣常用嘅租金收益率根本就用唔着。然則，要評論樓市，內地資金去留成關鍵，若然現況持續，樓價唔會落得幾多。
反過來，若然內地資金撤出，以目前香港經濟嘅基本因素，實難以支持現時嘅樓價，屆時香港樓市泡沫有爆破之虞，但政治上是否容許這個情況出現，點樣先至係最符合香港人利益，真係有理說不清，這亦令評估地產股估值及風險水平增添難度。
回說股市，有消息指中國證監會擬修改法例，以放寬中小企業來港掛牌。不過，阿莊就認為，香港唔能夠為咗搞活新股市場就唔理好醜照單全收，只有引入具質素嘅新股，才真正對股市擴容及投資者利益有好處，香港監管當局應積極研究如何做好把關工作，唔好淨係識得見錢開眼。
內地貴客源源不絕
個別板塊方面，昨日本地零售股表現出眾，周生生（00116）升7.4%；六福集團（00590）創五十二周新高12.5元，收市報12.44元，升11.8%；景福集團（00280）及謝瑞麟（00417）亦分別升10.7%及4.9%。內地貴客源源不絕，讓金飾鐘錶等零售商業績得以更上一層樓。
順勢而為，可留意英皇鐘錶珠寶（00887）。公司喺香港、澳門及內地從事銷售歐洲製名錶及自行設計之名貴珠寶首飾零售業務，近年公司致力拓展內地市場，去年度業績披露，計劃於未來一年喺十至二十個地點開設店舖，包括北京、上海、蘇州及湖南，其中位於國貿商城第三期嘅「勞力士」旗艦店，已於今年五月開幕。
以英皇嘅品牌優勢，拓展內地市場可謂事半功倍，而對於一家身處經濟快速增長地區、且經營成功嘅奢侈品零售商，股價絕對有條件享有較高嘅估值。該股現價往績市盈率才十二倍，可塑性高，若同類股份的利好氣氛持續，英皇鐘錶可反覆向0.65至0.7元推進，止蝕位0.49元。
戰報
周生生（00116）
Sammi周二指周生生有勢挑戰高位，昨日創15.46元一年新高，較推介當日低位13.76元升超過12%。
六福集團（00590）
史提芬昨日推介金飾零售股六福，成功創出12.5元一年高位，以低位11.06元計，單日升幅達13%。