今時今日，乜嘢都講求效益，幾網融合更係大趨勢。好似和記電訊（00215）咁，佢哋嘅流動電話同WiFi服務向來都係以「3」香港做品牌，有見「3」嘅成功，集團尋日宣布，將旗下和記環球電訊嘅固網寬頻、家居電話同長途電話服務IDD0080全部納入「3」品牌嘅大家庭。
正如公司流動電訊營運總裁龍佩英話齋，將啲產品納入同一個品牌，可以更全面發揮流動通訊同固網業務嘅協同效應。
和記電訊更加搞咗個「3寬頻無限」嘅宣傳活動去推廣呢次品牌重組，搞宣傳又點少得優惠，為配合「3」呢個大家庭有固網同寬頻兩大服務加入，「3」推出99蚊月費嘅100M家居寬頻服務（合約期三十個月），99蚊100M已經好抵玩，點知「3」話成功申請再送六個月100M寬頻免費或者三十個月家居電話服務，計吓數，100M寬頻可以平到一個月唔使80蚊，堪稱全城最平。
廣告出街後，唔知有無行家跟呢？如果有，一眾網民就至高興。