正所謂「禍不單行」，再有內需股被突如其來嘅負面消息打擊，繼霸王（01338）事件後，瑞年國際（02010）因市場流傳有關產品嘅負面消息，搞到股價急挫，要中途拉閘，停牌前報4.53元，跌16.11%，成交1.38億元。
瑞年拉閘靜觀其變
老實講，消費者對內地產品質素嘅信心容易被動搖，呢個現實情況唔難理解，有心人利用呢個弱點，造謠打擊大品牌銷售表現，可能性亦不容抹煞。喺搞清楚來龍去脈前，阿莊亦冇任何立場，只知從投資嘅角度睇，市場永遠係危機並存，且靜心觀察事件進展，留意執平貨機會。
昨日一個異動嘅板塊，乃本地券商股。時富投資（01049）及時富金融服務（00510）聯合發表聲明，指獲一名獨立第三者以書面形式接洽，表示有興趣收購時富金融嘅金融服務業務，及/或以收購時富投資於時富金融嘅現有股權，而時富金融亦已與該獨立第三者就該項有可能之交易簽訂意向書。
炒券商股留意風險
消息刺激時富金融股價復牌後曾高見1.19元，收報0.91元，升24%。其他券商股亦受帶動、高信集團（00007）升32%。若然本地券商真係咁有價，可順勢留意結好控股（00064）及英皇證券（00717），但就補充一句，時富金融嘅洽商能否開花結果，存在變數，跟炒亦宜注意風險。
昨日另一個異動板塊乃風電股，龍源電力（00916）急彈9.59%，而中傳動（00658）亦升4.2%。大價股先行，可以順勢留意同類細價股，如航天萬源（01185）及中國風電（00182）。此外，太陽能股保利協鑫（03800）亦有動靜，昨以全日高位1.83元收市，升3.9%，成交1.35億元。歸根究柢，都係多得「摩笛」發功。查實本月初，大摩已經喺其「策略意見」預測，保利協鑫股價將於未來六十日內相對大市上升。
近日大摩再度出招，指預期保利協鑫生產嘅多晶硅及硅片成本將會下降，到年底可成為全球生產成本最低嘅硅片生產商，故將其目標價調高一成至2.2元，評級為「增持」。
「摩笛」再次奏起，好明顯係和應月初嘅「六十日」預測，總之吹到起為止。不過，過去「摩笛」嘅預測唔少都應驗，即使唔信亦冇謂對着幹，炒家隨波逐流無可厚非，作為參考，向上較大阻力喺250日線2.06元，止蝕位訂在10日線1.7元。
戰報
海信科龍（00921）
阿莊本月九日指海信科龍潛力未反映，股價昨日高見3.87元，較推介當日低位3.33元，累升逾16%。
中國航天萬源（01185）
錢進上周五推介航天萬源，表現同樣唔失禮，當日低位0.79元，昨日一度升上0.86元，升幅近9%。