本文重點
幾年前，路勁基建（01098）公布用接近13億元收購順馳55%股權，順馳當時有近700萬平方米嘅土地儲備，對於有意進軍內地房地產嘅路勁嚟講，不失為一條「捷徑」。殊不知路勁主席單偉豹近排喺內地一個晚宴上向傳媒大吐苦水，話當年估唔到順馳個「窿」有咁大，呢單收購其實蝕底咗，直到去年先開始真正賺錢。
填氹多年苦盡甘來
內地嘅《每日經濟新聞》引述單偉豹話，當年收購前前後後只用咗個幾月時間，直至收購完成後，喺○六年底先發現「窟窿」遠比想像中大。樓價到○七年開始升上去，一班管理層開心咗冇幾耐，○八年樓價又再跌過，一路捱到去年，路勁地產先開始真正賺到錢。
呢次經驗教識咗單偉豹，以後收購新項目要多花時間調查，但佢覺得內房業最少仲可維持二十年嘅發展。