乜嘢叫許可範圍？即係「非穿着制服及無需見客同事」，咁又啱嘅，如果分行嘅職員都穿便服，客戶好易搞錯。依家時裝款式好有個性，分分鐘好似「無王管」。為令大家清晰，恒生對便服有定義嘅。

恒生講到明，唔可以着牛仔衫褲、運動衫褲、單件背心、三個骨褲、短褲、迷你裙、波鞋、屐、拖鞋同拖鞋款涼鞋。指引所講嘅便服，講明要係適合辦公室着，太子覺得女員工可能好多變化，而男仔當日同平時唔同嘅地方，應該最大分別就係唔使打呔。

120員工捐血50公升

除咗呢項德政，恒生近日見到紅十字會話血庫嘅血「入不敷支」，要大家多多捐血，上星期恒生銀行就有一項「募捐」，聽講恒生超過120個員工短短兩日已經捐咗50公升嘅血畀紅十字會。

捐血近70次嘅樓宇貸款授信部職員鄭國光，向太子介紹捐血好處，話捐血救人之外，仲可以促進新陳代謝，令身體更健康。新進捐血善心人葉曉暉就來自基金投資服務部，今次係第一次捐血，話恒生安排捐血日幫佢行出第一步喎。