內地官方傳媒引述國務院總理溫家寶表示，內地經濟季度發展速度按季有所回落，除了比較基數使然外，主要係主動調控嘅結果，並強調下半年經濟調控主基調係保持政策穩定，核心係保持經濟平穩較快發展、調整經濟結構和管理通脹預期三者之間嘅關係。言下之意，嚟緊調控唔會輕易「鬆手」，大家惟有接受現實，乖乖地等待調控成效顯現，期望屆時內地股市可以喺更健康嘅基礎之下再度重展升浪。
炒家呻冇啖好食
全球股市都唔上唔落，經濟數據又時好時壞，好淡兩邊都咁難做。據講下周五歐洲銀行壓力測試結果公布，且看於此前後會否出現較明確嘅方向。
對炒家嚟講，股票冇波幅係最慘。上星期五同經紀友好聚會，日日喺金魚缸中搵食嘅炒家，唔少都患有「三高」（高血糖、高膽固醇同高血壓），席間向一位「三高」老友問好，誰知呢位仁兄話，就嚟要問醫生點樣可以令「三高」創新高，皆因日日坐喺金魚缸前冇啖好食，玩得細冇肉食，玩得大贏十鋪唔夠輸一鋪，長此落去捱唔住，要快啲想辦法自我消失咁話。阿莊亦只有回應一句：「百忍成金！」
龍昌化身大球場
事實上，呢期股仔都唔係冇波幅，只係交投難與旺市相比，對於慣常靠「球」來「球」往搵食嘅大炒家，真係苦不堪言。
講開股仔，上周玩具股龍昌（00348）宣布，與內地第四大航空企業海航集團簽訂股權轉讓意向書，擬以60億元收購飛機租賃公司權益，藉此進軍發展潛力龐大嘅國際飛機租賃業務，上周三復牌後股價先高後低，一支大陰燭的確嚇壞人，惟見調整至0.37元水平開始現承接，上周五升勢再現，收市報0.455元，升15%，成交更高達2.23億元，相對於公司市值僅13億元，可以話係近期股仔中鮮見嘅「大球場」。
駿威（00203）私有化建議已順利獲得法院及股東會通過，停牌前做3.78元，長期捧場嘅小股東要將希望放喺廣汽身上。同屬汽車股，過去六個星期，華晨汽車（01114）嘅股價表現相對堅挺，上周五收市報2.9元，逼近五十二周高位2.97元，亦較五月份低位2.19元高出32.4%。
上周公司發出盈喜，正好解釋了股價偏強嘅原因。公司預期今年上半年業績將轉虧為盈，主要受惠今年初停止經營中華轎車業務，以及旗下合營華晨寶馬嘅盈利貢獻增長，喺近期汽車業銷量增長放緩嘅前提下，華晨呢份盈喜訊息確有助提振投資人嘅入市信心。業績公布前，如股價回吐守2.6至2.7元水平，可留意上車機會。
戰報
永保林業（00723）
冼金基上周五指永保林業開展新升浪，股價當日最高見過0.52元，較當日低位0.46元，升13%。
+13%
龍昌國際（00348）
同日積奇推介龍昌國際，其股價當日低位見過0.395元，之後一度掃上0.51元，較低位升近三成。
+30%