問史提芬點解港股弱成咁，真係唔識答，尋日大市表現之弱，恐怕令唔少好友大失所望。全日愈跌愈有，恒指最終跌305點，收報20,255點，成交不跌反升，去到556億元。43隻藍籌中，得3隻有得升，可見跌市都幾全面。查實環顧四周圍，西班牙尋日賣30億歐元十五年期債券，市場反應唔曳，美股更是七連升，港股大氣氛係冇乜負面消息，唯一是內地無放寬宏調力度的意圖，下半年中國經濟增長存有隱憂。瑞信估計固定資產投資放緩，下半年經濟增長會減慢，去到8%，第四季採購經理指數（PMI）更有機會跌穿50水平，簡言之，是由擴張變成收縮。
技術走勢，恒指由低位19,777點彈上前日高位20,722點，一共升咗945點，用了一日半時間去番20,255點，唔見咗467點，接近升幅一半，波浪理論話跌浪需時較短，往往只係升浪三分之一，照理一連兩日調整，幅度同時間都唔算特別誇張，問題係外圍普遍唔錯，港股卻獨跌，一旦歐美股市炒完業績開始掉頭，到時港股真係唔知點算！
農行登場難寄厚望
農行A股（601288）首日掛牌，收報2.7元（人民幣．下同），比招股價2.68元微升兩格或者0.75%。今日輪到H股（01288）掛牌，保薦人應該好唔得閒，要出動「綠鞋」頂住免得破發有辱國體。農行定價唔算特別平，儘管農村經濟長遠或者比城鄉發展潛力更大，但如果唔係諗住十年八載之後嘅事，建行（00939）及工行（01398）仲係比較吸引，短期筆者對農行無乜憧憬。
論估值，建滔積層板（01888）是長期低水的工業股，往往在市場缺乏焦點時，出現火燒冷灶情況，尋日逆市升0.2元，報7.02元，是五月中以來首次企在50日線（6.98元）上收市，看來短期弱勢經已扭轉。
建滔板四年前分拆自建滔化工（00148），主要生產用於印刷線路板的覆銅面板，生意好壞，同電子消費品及半導體行業興衰有直接關係，半導體股龍頭英特爾日前份季度業績破晒紀錄，估值卻處於歷史下限，反映市場對好景可維持幾耐有所保留。早前有大行報告都估到因為歐債危機影響，積層板五月份歐洲出貨量有明顯下滑情況。
估值較同業存折讓
中國目前是建滔板最大市場，人民幣銷售佔總收入四成，或許令捧場客稍稍安心一點，事實過去兩年的金融海嘯下，其業績波動性比其他同業為低，預期市盈率8.8倍，比亞洲同業平均的10.6倍有一成七折讓，儘管大環境下，基金經理未必會信心十足地一窩蜂捧場，但股價走勢有改善，加上估值都算吸引，重返8元附近的機會未能抹煞。