港股亦發軟蹄，恒指午後跌幅擴大，低位見20,226點，收市報20,255點，跌305點，大市成交增加至556億元，但見中資股炒風轉靜，皆因先有紫金礦業（02899），後有霸王（01338）事件，昨日就輪到TCL多媒體（01070）發盈警，引發股價急挫，呢啲突如其來嘅負面消息，足以影響炒作氣氛。風頭火勢，炒家略為減磅亦係正常舉動，且看認購農行H股嘅資金解凍後，去向如何。
TCL咪亂博反彈
回說TCL多媒體，公司突然就今年上半年嘅業績發出盈警，預料中期業績將轉盈為虧，消息震驚金魚缸，皆因一直以來大家嘅理解，係家電產業獲「家電下鄉」及「以舊換新」等補貼政策扶持，家電產品銷情暢旺，萬料不到作為主要家電生產商之一嘅TCL可以轉盈為虧咁離譜，故見昨日股價一度被質低至3.43元，收市報3.48元，跌15.7 %，成交1.25億元，連帶創維（00751）及海信科龍（00921）分別跌6.77%及2.75%。無論公司點解釋，相信短線股價仍會受壓，而今次事件已引發家電股重估潮，睇清楚局面前，都係唔好隨便博反彈。
滬綜指昨日走勢偏軟，內地經濟數據出爐，上半年CPI同比上漲2.6%，其中六月份上漲2.9%，通脹受控，加息預期下降，相信有助緩和內房股沽壓。現時經濟數據強弱不定，加上外在因素又難以掌握，所以依家中央政府都係採取一動不如一靜嘅態度，相信唔到最後關頭都唔會真正「鬆手」。
大豆漲價有助盈利
去年，佔中糧控股（00606）收入最大比重嘅油籽加工業務，因原料價格下跌，對產品價格造成壓力下，收入貢獻微降2.6%。不過，最近兩個月，國際大豆期貨價格展現強勢，對中糧而言實屬好消息，但似乎尚未反映喺股價表現上。此外，中糧近年致力打造一個覆蓋農產品上游採購、加工及物流嘅完善產業鏈。憑着圍繞農業及內需嘅政策優勢，相信未來公司可以加快發展步伐，短炒長揸皆有可為。
集團股價近兩個月一直沿250日線反覆回升。上月CPI增幅遜預期，必需品嘅提價預期降溫，或對食品股造成壓力，但這反可視為吸納中糧嘅機會，目標睇10.5元，穿8.3元止蝕。
戰報
寶姿（00589）
MAY指寶姿有大行掃貨，昨日雖一度跌至20元，但低位有買盤積極吸納，最後收21.45元，反彈幅度超過7%。
思嘉集團（01863）
錢進昨日推介的思嘉，昨日一度低見3.18元，但午後走勢轉強，股價最高更見過3.34元，單日升幅達5%。