相比之下,港股表現稍嫌失色,尋日早段高開近300點,見一見全日高位20,722點便拾級向下,最後升得129點,報20,512點;港股升唔起,一來歸咎於A股走勢麻麻,兩點半港股復市時,上證指數幾乎去到全日低位,其次係農行(01288)A股今日掛牌,街外估計股價會介乎「破發」至3%升幅之間。近期反彈幅度唔細的內銀股,高位沽壓都幾重,限制咗港股升幅。
總結後市應該仲係牛皮向好,要跌穿20,350點支持唔易,但要一舉衝破20,950點阻力同樣困難,除非中央肯減低宏調力度,否則暫時見唔到潛在消息,可以讓港股作為突破藉口。
英特爾帶起電腦股
講番美國晶片巨人英特爾,截至六月底季度業績賺咗28.9億美元(約225.4億港元),跟去年同期蝕3.98億美元(約31億港元)比較,可說來了個大逆轉。業績最令市場鼓舞的,除了來自商用電腦定單的明顯改善之外,過去三年因金融海嘯而令唔少美國人對換電腦興趣大減,到微軟舊年出咗Windows 7,今年經濟又開始有轉機,專家話英特爾的季度業績意義重大,標誌着期待已久,新一輪換腦潮的正式來臨。
到底應唔應該直接買入PC相關股份,例如聯想(00992),筆者是有些保留。個人電腦屬於周期性產業,英特爾除咗二○○○年科網潮見過六、七十倍市盈率外,過去廿年歷史估值主要是在十至三十倍之間浮沉,現時預期市盈率十一倍,反映市場認定,目前或者不久的短期內,行業正處高峰,下一個將會是收縮回落周期。
如果畀筆者揀,會情願選擇行業供應鏈更滯後的設備供應股,當晶片及半導體業進入黃金階段,閒置產能大減,廠商必然會爭取在高峰期步入尾聲前投資擴產,賺最後一桶金。也因此,設備供應商往往在產業逼近高峰時,才出現定單暴增的情況。
港股之中,ASM太平洋(00522)可能是唯一選擇,公司為半導體、集成電路及發光二極管行業提供集成封裝設備及解決方案,客戶全屬大型跨國芯片製造商,簡言之,半導體行業設備使用率愈緊張,ASM生意便愈多。
逆市擴產修成正果
年初至今,ASM股價累計下跌12%,跑輸大市,過去兩年賺9.73億及9.35億元,即使比高峰○七年12.7億元低,但業績波動性已比不少半導體企業理想,也顯出管理層功力。過去兩年逆市擴產,相信會修成正果,預期市盈率14.3倍,比歷史估值16.2倍低,觀感較之聯想更穩陣,股價或許能藉廿八日公布的業績出現突破,不妨留意。