本文重點
萬眾矚目嘅球壇盛事世界盃日前圓滿閉幕，相信好多球迷都意猶未盡，好似恒生銀行（00011）總經理兼財資及投資業務主管馮孝忠（Andrew）咁，佢尋日出席該行贊助嘅警方撲滅青少年罪行比賽頒獎典禮時，亦都以足球作比喻，寄語青少年，其實每個人都有長處，就好似球員咁可以各展所長喎。
各有天分盡展所長
今年係恒生連續第九年贊助呢項活動，主題係青少年禁毒及打擊資訊科罪案，吸引超過14萬名青少年參加，參賽者經過問答比賽、閱報報告、寫作、才能測試等，勝出嗰21個可以喺下個月去加拿大交流。
對於啲攞唔到獎嘅參賽者，Andrew就以足球運動作比喻，話球場上每個球員各有天分，攻守崗位同樣重要，希望青少年發掘自己嘅長處並加以發揮，無論係幫警方將罪犯繩之於法，抑或為防止罪案發生出一分力，總之一齊協助警方減少毒品及網上罪案啦。