本文重點
曾被譽為「公職王」嘅前中信泰富（00267）董事總經理范鴻齡（Henry），舊年因公司炒燶外匯而辭晒所有職務至今都成年幾，一直深居簡出，周不時唔喺香港，有時去咗旅行，有時就出trip，好少喺公開場合露面。
坐鎮家族慈善基金
不過，無幾耐之前佢竟然出席咗一個招商活動，究竟有咩搞作？佢當時派嘅卡片係范氏慈善信託基金主席，原來佢家陣全情投入咁搞緊慈善。
Henry同太子講，佢哋嘅慈善基金有好多搞作，但以教育為主，遲啲佢仲要發大嚟搞添，至於詳細情形，就賣個關子先。
太子有啲疑惑，佢同中信泰富前主席榮智健情同手足，可以話係共同進退，大家離開中信泰富嘅日子都差唔多，平時兩個出雙入對，連傾偈都用上海話，家陣榮智健另起爐灶，連佢喺中信泰富嘅前秘書都過埋檔幫手，佢無理由冇份參與。Henry話，佢家陣只係一心一意想搞好個家族慈善基金。