本文重點
萬眾矚目嘅農行（01288），A、H股將於今個星期四同星期五喺滬港兩地分別上市。太子聽聞，農行完成A、H股上市後，將會喺今個禮拜日（十八日），喺北京人民大會堂舉行大型慶祝上市酒會，當日場面肯定係盛況空前，大家想像得到嘅大人物都應該會到。
喺人民大會堂舉行
翻查歷史，工行（01398）○六年喺滬港同步上市，當時慶祝工行A、H股上市成功嘅大型儀式，亦喺北京人民大會堂舉行，所以話，農行好多事宜，都同工行「看齊」呢！
工行當年上市，由於A、H股係同日上市，中港兩地嘅上市儀式當時首次現場直播，仲邀得特首破天荒出席。據聞，今次農行亦都有邀請特首出席在港上市儀式。除了早上嘅上市儀式外，農行H股當日亦會喺香港舉行酒會。