本文重點
盈進（01386）公眾持股量偏低，好多小股民都知道，目前有超過七成股份由大股東陳美雙持有。至於持有超過一成股權嘅投資者許雲漢，執行董事兼財務總監朱賢文尋日透露，許氏的來頭唔細，擁有博士學歷。
朱賢文仲話，據知呢位博士級人馬，並非有意介入公司嘅營運，亦即是許氏未必會將股份「揸一世」，所以暫未有特別措施恢復公眾持股量。
太子成日都以為博士級人馬，好多時都只係會死讀書，將金錢視作浮雲。事實原來又係另一回事。以許雲漢持有盈進11.03%股權，即是6,865萬股，以尋日收市價計，身家已超過億元。
讚許雲漢眼光獨到
許氏仲曾經持有另一冷門印刷股星光集團（00403）逾5%嘅股權，難怪行政總裁喬維明，都讚許氏眼光獨到。