本文重點
今屆世界盃盟主之位誰屬，真係要踢過至知。八爪魚保羅就揀咗西班牙做佢嘅心水捧盃球隊，渣打香港CEO洪丕正（Ben）就好希望荷蘭隊贏。無論賽果如何，荷銀經濟師Hein Schostman嘅分析就話，捧走世界盃對國家嘅消費與經濟會有刺激作用，甚至帶動GDP增長0.25個百分點。
捧盃國家經濟更旺
唔好以為Schostman因為祖國打入決賽先有如此分析，事關早喺今年四月，佢所撰寫嘅「Soccernomics（足球經濟學）2010」報告，已預測西班牙會成為今屆盟主。Schostman昨日同外電講，若由祖家荷蘭贏波，全國球迷肯定會欣喜若狂增加消費，帶動荷蘭嘅經濟增長。反之，若由西班牙捧盃，西班牙就有望阻止國內GDP收縮。而喺上屆意大利捧走世界盃時，荷銀亦曾即時將意大利嘅GDP預測調高0.2個百分點至1.7%，結果意大利當年嘅GDP增長更達2%。荷銀呢套「世界盃刺激經濟論」，又未必係全無根據！
世界盃期間，好多球迷捱夜睇波，搞到太子日頭返工時，臉上嘅眼袋無所遁形。見到阿Ben仲好精神奕奕，原來佢嘅睇波策略就係夜晚八時許先小睡片刻，然後到凌晨起身睇波，咁就自然抖足精神啦。