本文重點
世界盃賽事好快就去到決戰嘅大日子，呢排好多球迷捱到三更半夜都要捧場，估唔到連沿海家園（01124）主席曾文仲都係狂熱分子。尋日太子傳媒老友諗住去沿海家園全年業績會，同曾主席傾吓來年集團嘅業務大計，點知主席遲遲未見影，原來主席前晚為睇荷蘭對烏拉圭賽事，搞到晏咗起身。
買中荷蘭贏波
業績會原本十一時開始，不過成班記者朋友等咗十多分鐘都唔見主席出現，正以為港島例牌塞車有阻滯之時，主席就出現兼大聲道歉，好誠實咁講，原來佢之前嗰晚睇波睇得太夜，所以朝早遲咗起身，仲話買咗荷蘭贏，入埋飛買咗波膽3比1同2比1。
老友建議主席不妨效法361度（01361），讓員工喺世界盃期間遲一個鐘先返工，咁就皆大歡喜。