本文重點
農業銀行（01288）下個禮拜五就會加入港股呢個大家庭，加埋其他國有銀行，十足大團圓結局一樣。港交所（00388）交易大堂，一直有個地方掛起集資額最大嘅新股掛牌相，由於位置所限，只有十個名額，農行係「世紀集資王」，理論上應該排頭位，點知交易所規矩，呢批相嘅排位，只係計H股，農行嘅H股集資額輸咗畀工商銀行（01398），下個禮拜影嘅掛牌相，惟有將就一下，排第二位啦！
根據最新嘅定價及發行股數，農行H股集資額大概係935億元，當年工行嘅H股，集資額達到1,200億元。睇番依家嘅十張相，清一式係國企同紅籌，一半仲係銀行股，加埋農行，變咗六成係內銀股。
神華被迫讓位
有入就有出，邊個咁唔好彩被逼咗出嚟，咪就係排第十位嘅神華（01088）囉。照呢個邏輯，排第九位嘅中石化（00386）都唔係好穩陣，皆因農行之後，仲有AIA嘅上市計劃。據聞，佢哋想喺今年第四季上市，集資額或者會達到780億至1,000億元，AIA成功上市，自然又會插隊，到時中石化真係冇得留低。