有股仔炒最精神，志強尋日見到中盈國金資源（00766）反彈一成，成幅圖表走勢靚番晒，應該可以博一博。早前中盈國金以每股0.19元，批股畀幾個大型基金，當中包括富達、景順、滙豐旗下個Halbis同埋Och-Ziff資產管理，呢幾個基金，肯入股呢間蚊型公司，當中梗有原因。集團在○九年收購黑龍江中誼偉業，至今年五月再增持，目前股權高達92%，而中誼偉業所持金礦黃金資源量目標可達100噸。

睇番資料，中盈國金計劃將黃金產量由每年5,200安士，增至超過9萬安士。公司亦已發現其他26個礦點，並進行更深發掘，目標係將資源存量提升至超過30噸。單睇呢堆數字，可以明白到點解中盈可以吸引咁多基金入股，以基金入股價再加番五成上升空間，目標可見0.285元，就算打個折扣，中盈點計都有條件見0.25元，跌穿0.173元止蝕。

中盈國金資源（00766）目標價：0.250元　止蝕價：0.173元