內地地產龍頭萬科老細王石唔止個名夠硬淨，原來人如其名，個性一樣咁硬淨，佢除咗係起樓高手之外，仲係登山高手。佢已經完成咗攀上七大洲最高峰嘅壯舉，早前佢同一班老友去珠穆朗瑪峰嗰陣，仲化身成環保大使，執咗一大堆垃圾走；佢平日更加會用「手巾仔」，慳番啲地球資源咁話。
太子未聽過珠穆朗瑪峰呢啲極地會有垃圾執，而且竟然有人咁沙膽喺呢啲地方隨意丟垃圾？
執走167個氧氣樽
原來王石一行人執嘅包括167個氧氣樽，太子估計，應該係途人喺呢啲空氣咁稀薄嘅地方用晒啲氧氣，之後無力執埋個樽走，都算情有可原。王石原本仲想將呢167個樽放喺世博嘅「萬科館」展出，不過因為安全理由作罷。
