05/07/2010

播放本新聞相關短片
查詢股票編號

Fundman睇市:港交所淡市冇有怕

踏入下半年,港股表現未有起色,歐美股市亦每況愈下,市場瀰漫悲觀氣氛。美國就業市場未有改善,美股上周五繼續下瀉,道指連續7個交易日低收報跌,納指更連跌十個交易日,美股疲弱程度,跟○八年十月金融海嘯時不相伯仲。

上月仍在發表樂觀言論,指美股在「歐豬」危機緩和後將大幅反彈,甚至有條件創新高的前大摩全球策略師碧斯,亦打倒昨日的我,大手沽掉其管理基金的半數股票,其中科技股更已全數清倉。碧斯表示,改變投資策略,主要是由於雙底衰退的風險上升,在不欲面對風險的情況下,寧願增持現金。

不僅股市顯著下跌,在市場信心逐步減弱下,紐約商品交易所的黃金期貨,上周亦累跌近4%,為六個星期以來最大跌幅,最新報1,207美元。

跌市皆因市場缺水

港股上周已率先下跌,主要係內地股市表現出乎意料的差。史提芬堅持今年餘下時間,港股仍會以上落市為主,一面倒睇淡或睇好,只會淪為輸家。上周港股急跌,唔多唔少跟農行(01288)開始招股,市場資金忽然抽緊有關。農行A+H齊齊招股,市場逾千億元資金被抽走之際,中行(03988)又話要供股,咁又抽走幾百億元,計埋之前交行(03328)供股,呢條數唔係細數目。

轉頭又睇番物業市場,雖然港府推出「九招十二式」嗰一刻,樓市成交係靜番些少,但未見價量齊跌,之後資金更有重新投入物業市場之勢。較早前,何文田地皮以天價拍賣,發展商手中持貨善價而沽,未見有劈價益買家,轉個頭,大型屋苑交投又回升,市區旺地樓價更勝從前。始終「歐豬」危機令息口持續低企,唔好話要對抗通脹,單係要對抗歐美兩地狂開印鈔機,令「銀紙」唔見使,買磚頭保值似乎更實際。相比起忽上忽落的股票市場,稍為保守的投資者,都寧願將資金投入物業市場,又係股市缺水另一原因。

睇番港股第二季平均成交額,徘徊600億元附近,只有620億元,按年跌13%,睇埋近呢一兩個月,更有唔少時間每日成交額得500億元左右,但係港交所(00388)股價,跌至120元附近,似乎又有支持,唔多跌得落。事關下半年估計IPO集資額將遠超上半年,單係呢個月上市嘅農行,集資額已達940億元。預期下半年準備來港上市的企業達31間,集資額共1,915億元,呢個數仲未計已定下上市時間的企業,同埋大有機會在第四季捲土重來,再提上市的AIA。

大型IPO陸續有來

若然AIA成功申請上市,其集資額將高達200億美元;至於全球第一大鐵礦石生產商,巴西淡水河谷亦爭取在本年底或明年初來港上市;另有蒙古、澳洲及俄羅斯企業,亦有計劃來港上市。事實上,俄鋁(00486)今年初在港股掛牌,證明港股已成功邁向國際化,不僅為本地及內地企業提供上市平台,環球企業均有意在港股尋找集資渠道。另一方面,港交所亦積極推出更多投資產品,尤其是與人民幣相關的產品,料可成為未來推動盈利的動力,因此無論市升市跌,就算成交未算暢旺,港交所仍有能力跑贏大市,值得睇高一線。

史提芬