05/07/2010

播放本新聞相關短片
查詢股票編號

股海實戰:華潤燃氣實力再提升

剛剛踏入下半年,全球股市向下,美國經濟數據疲弱,美股三大指數上周五同創今年新低,內地A股市場表現亦較預期差,滬綜指失守2,400點關後尚未有似樣反彈。睇外圍局面,季內港股再試19,000點支持機會甚大,除咗可以搞搞Put輪同熊仔之外,短炒選擇愈來愈少,炒家可以安心抖暑。

下半年股市利淡,內銀股鬥快「搶錢」。除了正進行IPO集資嘅新股農業銀行(01288),以及正在進行供股集資嘅交通銀行(03328)之外,中國銀行(03988)亦落實擬進行10供1.1股,A股及H股供股比例相同,料集資總額達600億元人民幣。

令阿莊感到意外嘅係,中行早前才發行400億元人民幣的A股可轉債,還以為涉及其A股嘅再融資計劃暫告一段落,誰不知咁快又傳來供股消息,且AH比例相同,係咪管理層對經營環境嘅展望有新睇法,倒值得關注,而仍有待落實集資方案嘅工行(01398)及建行(00939),又會否「不甘後人」,加快推出融資方案,諸如此類嘅憂慮,打擊投資者信心。

工業股宜趁高套現

眨吓眼一○年又過咗一半,令阿莊最感失望嘅,係中國出口表現未及預期,出口股真正復甦仍遙遙無期,阿莊日前將手上的廈門港務(03378)沽出後,持倉已沽清港口股。另一方面,上半年,尤其係首季,工業股嘅出口定單反彈較快,加上去年同期比較基數較低,故料今年上半年業績可報佳音,而股價表現亦某程度上反映咗呢份預期。

不過,次季出現歐洲債務危機,歐、美經濟再響警號,加上原材料價格回升,以及下半年人民幣好大可能升值等潛在風險上升之下,工業股嘅經營環境將再次面臨考驗。故阿莊認為,對待股價仍處高位嘅工業股,獲利套現方為上策,下半年應該會再有低吸機會。

母公司注資可憧憬

回說中資股,內銀股暫宜避一避,喺內地經濟增長放緩嘅陰霾之下,相信基建、燃氣、鐵路建設、家電、汽車等國策股可吸引避險資金進駐。華潤燃氣(01193)上月宣布與天津燃氣訂立合作協議,擬組合營共拓天津燃氣市場。此外,華潤燃氣母公司華潤集團近日與中國石油集團簽署戰略合作協議,此舉有助確保華潤燃氣嘅氣源供應,消息正面。受惠業務自然增長及新收購所帶來嘅效益,相信華潤燃氣今年嘅業績與股價一樣,可以更上一層樓。

上周五潤燃收市報11.24元,估值具支持,下半年母公司落實注資嘅進度,將成為刺激股價表現嘅催化劑。

戰報

領匯(00823)

阿莊上周三推介領匯,指其防守力強,當日股價低見19.36元,上周五逆市做好,最高見過20.4元,升幅達5.3%。

德永佳(00321)

史提芬上月二十九日推介德永佳,當日最低報7.2元,之後有反彈,上周五最高升過上7.68元,累積升幅達6.6%。

阿莊