諗住攞經驗 一做33年

Nixon話佢爸爸係做出入口生意，讀完大學本來都想好似爸爸咁，做一個成功嘅生意人，但係初出茅廬咩都唔識，咪諗住入銀行接觸吓各行各業，擴闊吓人脈，點知做完外資行見習行政人員之後，一加入滙豐就做咗三十三年，連當初創業嘅念頭都掉低埋。

太子梗係問吓Nixon點解做銀行做到唔捨得走啦，原來係佢覺得做銀行好有挑戰性，話當年曾經以三十幾歲之齡，接替咗一個夠六十歲退休嘅主管，負責管理金庫，對住一大班既係老前輩又係下屬嘅同事，佢只好加倍努力，仲改革埋金庫管理，成績做得好，伙記自然服佢，就係呢份滿足感，佢先決定繼續做賓架。佢依家仍然幹勁十足，全因佢樂天性格，唔會將工作嘅問題帶回家，畀自己可以真正享受天倫樂。