01/07/2010

播放本新聞相關短片
查詢股票編號

任志剛公開處事哲理

金管局前總裁任志剛尋日去咗聖保祿男女中學擔任畢業禮嘉賓,雖然唔係返母校,但佢嘅仔女原來係呢間學校嘅舊生,心情大好嘅佢仲向學生親授做人嘅道理。

首先佢以打高爾夫球為例,帶出「急事慢行、慢事急行」嘅哲理,所謂急事慢行,簡而言之即係欲速不達。任總話,千祈唔好因為心急而作出錯誤決定;慢事急行,即係凡事講求效率,唔好臨急抱佛腳。

任總教學生人生風險管理時,不經意引用咗金融術語,好似教學生做好風險管理,同埋做足壓力測試。

任總仲鼓勵同學,無論成績好與壞,都唔好向後望,最緊要永不放棄,千祈唔好低估自己嘅潛力,因為人生有好多章節和段落,要相信自己有能力改寫人生。

自嘲掹車邊讀大學

佢謙稱自己四十幾年前嘅成績都係「掹車邊」入到大學,因為六十年代香港政治動盪令好多強勁對手都出國讀書,自己先有機會升讀大學,但之後佢憑住努力不懈,以一級榮譽喺港大畢業。