事實上，近期歐、美股市唔上唔落，除咗係傳統基金半年結因素外，投資者亦在觀望歐洲銀行嘅壓力測試報告結果。還記得去年五月上旬，美國聯儲局宣布銀行壓力測試報告結果，其後十二個月美股反覆上升，累計升幅超過三成。歐洲股市喺今年次季累計跌幅近兩成，係唔係頗大程度反映咗銀行業風險因素，會唔會成美股翻版，相信好快會有答案。
經紀交數焗炒騰訊
本周二期指結算，恒指繼續窄幅上落，成交淡靜。上周五跟經紀聚會，問起炒緊咩股，答案竟然係大晒士嘅騰訊（00700），可想而知指數冇波幅，炒家長駐嘅指數牛熊證同窩輪都冇得炒，為咗交數，單日股價波幅有三、四蚊嘅騰訊啱晒胃口！
停牌已久嘅中新地產（00563）上周五終於復牌，收市報2.84元，跌42%，小股東等到頸都長，如今持股總算可以解凍，但價值就唔見一大截。不過，如今上實（00363）已成為中新嘅大股東，而上實亦已就中新提全購建議，每股作價2.32元。既然公司泊到大碼頭，而且有個全購價作為參考，原小股東若不急於沽貨，可以睇定啲；若然本身冇持貨，高追可免，但2.5元或樓下水平就應該有得博吓！
中國推動匯改，七月起人民幣跨境貿易結算擴至廿個省市以至全球國家及地區，國際化進程又邁進一大步。另一方面，透過擴大人民幣嘅跨境貿易範圍，在港嘅人民幣資金結餘亦會增大，有助加快推動香港發展成人民幣離岸中心。中銀香港（02388）作為本港唯一嘅人民幣清算銀行，喺爭取相關業務上有一定優勢，難怪近日先後獲高盛及摩通發報告唱好。
有力挑戰20元關
中銀股價上周五逆市上升，收報18.26元。由於新政策有助提升盈利前景，相信短期股價升勢可延續，今浪有力挑戰20元關阻力，支持位可參考五月底低位16.16元。若想吼認購證，可留意中銀麥銀認購（17248），今年十二月到期，10換1，行使價18元，溢價7.4%，實際槓桿5.9倍。
戰報
快意節能（08032）
MAY周四推介的快意節能，上周五以最高位0.52元收市，短短兩日已較低位0.485元升7%。
航天控股（00031）
錢進本月二十三日指航天走勢見突破，上周五股價最高升過上1.03元，較推介當日低位0.94元升9%。