本文重點
港龍航空七月就二十五歲生日，為咗慶祝呢個大日子，嚟緊會有一連串優惠活動，實行同乘客共同慶祝生日。太子聽行政總裁唐偉邦（James）講，今年五月至六月嘅收入同載客人數，比起舊年同期反彈咗三至四成。業務回升，對於港龍來講，呢份一定係最好嘅生日禮物。
網上訂票有抽獎
港龍八五年七月二十六日首航往馬來西亞，眨吓眼就已經二十五年。港龍會喺生日當日，喺網上舉行大抽獎，但凡喺二十六日凌晨起二十五個鐘頭內上港龍網頁訂機票，就可以參加抽獎，有機會抽到同等價值嘅機票回贈現金券，用來買港龍機票。
James話，舊年五、六月時生意跌咗三、四成，但今年已明顯反彈，相信全年應該有一至兩成增長，返去金融海嘯前水平。