即場欣賞珍藏國畫

恒生（00011）日前就嘗試用8道佳餚與美酒嘅「配對」，豪宴150名特選私人銀行客戶，並同場展出40幾件國畫、水墨畫及藝術珍藏品，務求透過品酒、賞畫、嘗佳餚，同客戶打好關係。

恒生今次一連兩晚舉行豪宴，可謂不惜工本，除咗由前國金軒行政總廚，現為恒生「博愛堂」總廚陳錦成設計晚宴菜單外，仲搵嚟專業品酒師周國明為菜單「配對」美酒，8道菜配搭8款不同名酒，當中瑤柱竹笙燕窩羹大家可能食過，但加入XO酒一齊品嘗，又係另一番滋味；另外蜜餞吉品鮑魚扒花膠件，配以九六年波爾多紅酒，認真夠格調。

恒生助理總經理兼私人銀行及信託服務主管李佩珊講，佢哋今次總共開咗280支靚酒，仲預備咗千隻酒杯，至於用咗幾多錢？佢笑言並唔重要，最緊要係夠心思。佢仲話，為咗盡善盡美，自己親自先後試咗7次菜。