聯儲局聲明中暗示通脹威脅未成氣候，前晚聯邦基金利率期貨顯示，賭明年三月議息，息口仲維持在目前零至0.25厘超低水平的可能性，由48.9%升上68.1%，低息期會比年初大家估計的，更加長命。
樓市整固快速完成
尋日港股真係無咩好講，繼續消化連升九日累積的升幅。反而樓市近期有明顯回暖迹象，九招十二式證明只係增加售樓披露的花招，強推豪宅地拍賣，又搶到麵粉貴過麵包，可能大家睇死特區政府趕去「起錨」，短期無意思將冷卻樓市措施升級，近幾星期樓市成交量及成交價都由四、五月的低位回升，海嘯後的新一輪樓市整固期，短短幾個星期已經完咗。
其實大環境美國加唔到息，香港負利息引發資產價格上升的形勢，唔易逆轉，擁有百萬美元流動資產嘅港人，眨吓眼一年間多咗一倍，存款無息收，股市睇唔透，結果最後惟有流番去磚頭市場興風作浪。
樓市從金融海嘯低位升咗唔少，升勢更有從豪宅擴散到中低價物業的趨勢，唔少準買家驚高追摸頂，睇番地產股相對表現落後得多，回顧歷史，恒生地產股指數在九七及○七年「癲」峰期，分別都去到2.1倍市帳率，而九八、沙士及○八金融海嘯中的低位則介乎0.54倍至0.66倍，目前在1.16倍水平，說成風險好高，明顯唔似，史提芬認為新地（00016）及長實（00001）現水平都屬穩健之選。
大嶼山愉景灣發展商香港興業（00480），尋日表現認真搶鏡，升一成報2.85元，主要係業績虧轉盈、賺18.41億元的消息所刺激。去年，來自投資物業重估溢價10.9億元，前年帳面損失4.3億元，成為業績逆轉關鍵。另外，套現證券投資也賺得8,920萬元，餘下的大部分來自愉景灣「尚堤」賣樓收入，以及亞洲各地的收租物業租賃收入。
收入飄忽影響估值
大發展商手上項目多，容易做到貨如輪轉，相反興業集中地區發展，規模較細，售樓表現睇天做人，收入比較飄忽，或多或少令其難以取得高估值。睇番興業現價市值38.5億元，而今年三月底止股東資本有116.3億元，市帳率只得0.33倍，歷史上也只有樓市高峰期（像○七年），至可以超越1倍市帳率的界線。另一點是派息政策難以捉摸，今年只得中期息6仙，回報唔吸引，筆者不反對股民趁股價低殘做收買佬，但大前提要明白，對比大型發展商，其投機味道濃得多。