美國聯儲局會議維持利率不變,會後聲明指出,四月以來美國經濟持續復甦,但受高失業率、收入增長放緩等因素影響下,個人消費增長溫和,銀行放貸亦見收縮。
睇嚟,美國今年內都不會上調息率,港息亦會跟隨。喺咁低息嘅環境之下,地產價格難大跌,加上內地通脹壓力日增,將間接影響香港經濟,故大家要有心理準備,要迎來百物騰貴嘅日子!
中旅表現令人失望
阿莊仍然持有嘅中旅(00308),股價跌至上月低位1.47元才止跌,現價已反彈上1.77元。老實講,今年上半年中旅嘅業務理應較去年為佳,但股價表現卻背道而馳,現價市帳率僅0.87倍,走勢之差實在令人難以理解。
中國有13億人口,居民消費能力隨經濟起飛而增加,對旅遊娛樂等服務需求增長強勁,但偏偏呢家主營旅遊業務嘅紅籌股搞咁耐仲係冇咩大起色,叫股東輸錢都輸得唔甘心,班高管真係好應該檢討一下!
大型新股農行(01288)嘅IPO活動即將「起錨」,內地國泰君安分拆香港業務上市的國泰君安國際(01788),今日亦開始招股。目前,同樣背靠內地大型券商,可以直接跟呢隻新股比較嘅,首選應該係內地海通證券旗下嘅大福證券(00665)。喺影子概念嘅推動之下,難怪昨日大福股價異動,高位曾見5.84元,收市報5.83元,升6%,成交1,298萬元。
查實,阿莊唔係首次分析大福,呢隻股喺海通入主之後,憑着新大股東喺內地廣博嘅人脈關係及業務網絡,旗下包括證券、資產管理等整體金融業務,勢必會加快發展,所以係一隻好值得作中長線投資嘅券商股,呢個睇法至今仍未有任何改變。
至於短期走勢方面,由於有同類型新股上市,所以跟勢炒一轉亦可,待回吐守5.5元樓上可小注,博上6.5元,止蝕位為5.1元。
戰報
廸生創建(00113)
史提芬昨日推介的廸生,股價裂口高開後持續攀升,最高升過上6.15元,較即日低位5.45元升12.8%。
+12.8%
五礦建設(00230)
MAY本周二推介五礦建設,當日低位1.53元,昨日升至1.7元高位,累積升幅11%。
+11%