本文重點
前金管局總裁任志剛退休之後，首次出任上市公司非執董就揀咗建行（00939），可能係任總同建行董事長郭樹清惺惺相惜有關。尋日建行股東會，有小股東趁機問郭董，任總會拎幾多人工？郭總就解釋任總係做非執董，唔會有得支薪，最多係拎袍金，加加埋埋啲唔同委員會工作，都係十零萬，係「有限錢」。
小股東咁關心人工，唔知係咪畀貪婪銀行家收巨額花紅嘅新聞嚇親，所以問定先。抑或係驚任總喺建行會收當年金管局總裁嘅人工，雖然以前佢份糧係唔細，之不過工作量同埋責任咁大，比起嗰班美國華爾街賓卡，真係唔過分。
小股東為郭樹清出頭
雖然係問咗個咁敏感話題，實情班小股東真係好錫郭總為首嘅一班管理層。有小股東仲話，其實唔係好知建行做成點，但好信任佢哋，仲講咗一大堆期望嘅說話。有股東更加為郭總抱不平，問點解建行盈利表現咁好，管理層仲係要減人工。郭總話間間銀行唔同，唔可以一概而論。