聽聞唔少傳統基金，擔心歐債出事同美國加息，早在四、五月份減持股票增加現金比例，近期又蠢蠢欲動，主要係見到港股在恐慌的五月同歐豬危機中都跌唔穿萬九點，中央短期又可能為農行（01288）上市造勢，像日前的匯改重啟一樣，再出口術，基金經理焗住補倉，於是直接向兩大指數重磅股埋手。照昨日應跌唔跌的走勢睇，21,000點唔似今次反彈浪頂咁短癮，窩輪及期指炒家切忌扒逆水。
阿松金句：「有咁耐風流有咁耐折墮。」經歷金融海嘯及歐豬風暴，全球財富洗牌效應，尋日有投資銀行發表一項調查話，亞洲區擁有百萬美元的有錢人，比去年多咗31%，增長是全球之冠，當中香港有錢人數更增加1.04倍，是全球增幅最大地區。
有關調查出來的結果，其實是預期之內，尤其過去一年，香港樓市DEEP V反彈，股市也受惠於內地經濟保八成功，升咗唔少，擁有這兩種投資項目的港人，身家自然水漲船高。
中港富翁數目激增
筆者睇過《Business Week》同類調查，中國有錢人數增長同樣唔講得笑，舊年多咗三成去到67萬，最重要這批佔全國萬分之五人口的富人，卻控制全國財富。數字可見點解全球奢侈品品牌，無不希望到中國及有示範作用的香港搶佔山頭。
香港上市的中港高級零售股，選擇查實好有限，好似鞋王百麗（01880）、時裝品牌寶姿（00589）、時裝零售股JOYCE（00647），共通點係估值唔低，百麗往績市盈率三十二倍，今年估計回到二十八至三十倍，寶姿其實一直都企在三十倍樓上，自從早前出的○九年業績增幅放緩，先有21.3倍比較「低」的估值出現，至於JOYCE，去年受海嘯影響盈利大縮水，估值是高是低，且看今年業績可以恢復幾多。
廸生估值平絕同業
另一隻高檔零售股廸生（00113），或者是市場上最平之選，剛公布三月底止純利3.03億元，勁升4.9倍，撇除前年有固定資產減值，以及今年一筆過獲服裝及配飾分銷授權期限屆滿補償的1,820萬美元，相當於1.42億港元，廸生已十分接近海嘯前介乎1.8億至2.1億元的年利潤水平，以19.3億市值，估計今年市盈率在十倍以內，考慮手頭現金10億是市值五成，可真是奢侈品股中的滄海遺珠。