次季歐洲債務危機震散出口股，至上月底才告止跌回穩，就連航運股表現亦見改善。
但說也奇怪，近月反映乾散貨運費嘅波羅的海指數急回至年初嘅低位，若然跌勢持續，好難想像航運股反彈浪可維持多久，加上考慮到人民幣升值將令內地出口業添變數，故阿莊昨日落手清理廈門港務（03378），平均價1.43元，輸少當贏。
「有人辭官歸故里，有人漏夜趕科場」。本月先後有新股擱置上市計劃，但嚟緊又再有多隻新股招股上市，其中一隻係國泰君安（01788）。據講該股將發行4.1億股，其中一成公開發售，集資額介乎15.9億至23億元，本周五起招股，七月八日掛牌。國泰君安喺中資證券行中有一定江湖地位，睇好兩地金融業發展，呢隻新股可以留意。
本月中旬獲瑞信唱好嘅蒙牛乳業（02319），股價反覆向上，昨日曾高見26.2元，收市報26.15元，升1.75%，成交1.15億元。在最近公布嘅一份全球乳業報告中，蒙牛嘅全球乳業排名躍升3位，至第16名，係對其龍頭地位嘅肯定，亦反映早前入主蒙牛嘅中糧集團真係「無寶不落」。
本土乳品競爭力升
四月起日本爆發口蹄症，內地已暫停進口日本奶粉、牛奶及牛肉等產品，這對國產以及其他進口乳品商而言係一個契機，相關產品價格亦因市場供應減少而漲價，消息利好乳品股表現。
雖然消費者或多或少仍對國產乳品嘅質素存有陰影，但阿莊相信，乳品向來首重新鮮，喺產業政策扶持以及生產規範化之下，長遠而言，本土乳品仍會主導市場。蒙牛既已泊得大碼頭，喺採購原料及分銷產品方面嘅競爭力均有所提升，集團前景可看高一線。
自去年十二月見高位29.25元後，蒙牛股價反覆回落，至近月展開反彈浪，力度頗大，250日線支持經得起考驗。短期只要企穩喺24至25元水平，整固過後將再展新升浪，可留意上車機會，目標向30元關推進，止蝕位23元。
戰報
浪潮國際（00596）
本周二姚午齊推介的浪潮，當日低位0.71元，昨日顯著做好，最高升過上0.78元，短短兩日升幅達9.8%。
創新能源（00702）
志強本月二十一日推介的創新能源，昨日以最高位0.64元收市，較推介當日低位0.59元，累計升幅達8.47%。