本文重點
一條華爾街值幾錢呢？相信係一個天文數字。雖然經歷金融海嘯後，華爾街投行頭上嘅光環已經消失，但市值仍然係可觀數目，加上股價變動，秒秒鐘都可以大上大落，確係唔易計。不過，見證着呢條街甚至全球經濟興衰嘅一個華爾街路牌，尋日就以11.65萬美元成交，超過90萬港元。
見證美股世代興衰
其實呢個路牌自十九世紀初已屹立於華爾街，位處摩根大通一九一四年的前總部門前。據介紹，呢個路牌上有少少瑕疵，相信係一九二○年被炸彈襲擊嘅碎片所造成，真係別具歷史意義。
呢個華爾街路牌原本由一位收藏家擁有，並存放喺離路牌原來位置不遠嘅博物館，今勻易手，紐約佳士得拍賣行冇透露買家係邊個，而拍賣行原先估計路牌值6萬至8萬美元，所以拍賣結果係「超額完成」，證明歷史有價。