正當大家以為翁富澤離任滙豐中國行長兼行政總裁一職，好快轉到滙控（00005）其他部門之際，原來佢跳槽過富國銀行。突然另謀高就，認真嚇咗太子一跳！洋名Richard嘅佢喺滙豐足足二十年，輾轉負責過不同部門，○四年到滙豐中國，就見證佢開設第一家村鎮銀行支行，亦曾為集團成為第一家喺A股上市嘅外資銀行拚搏。
駐三藩市攻環球業務
滙豐已經發咗內部通知，話Richard今個月尾就正式同大家講拜拜，而另一邊廂，富國亦公布佢十月開始加入，負責環球金融機構及貿易服務、國際金融服務等。
Richard鎮守滙豐中國六年，未來佢將會駐守三藩市，唔知佢第時會唔會好懷念中國菜呢？