體操王子、李寧（02331）創辦人兼主席李寧，尋日到科大與大學生分享做生意經驗，太子係李寧嘅「粉絲」，梗係去捧場。李寧被人問到佢做生意成功嘅秘訣，佢就話現時未算真正成功，仍在努力將李寧品牌「升呢」，成為國際品牌。佢仲話，做人一定要有夢想，回想當年佢做運動員，情況亦都係一樣，到依家做生意，除咗夢想之外，最重要係要堅持，唔係就好難成事。
當年創業 差啲執笠
他回想起當年創業，同台灣及新加坡合資經營體育用品，一次入咗200萬美元貨，但就要花幾年才全部賣清，搞到公司差啲要執笠，好在當年內地嘅體育用品市場競爭唔激烈，公司繼續堅持經營下去，終於創出一片新天地。