近日被基金洗倉的騰訊（00700）再跌4.1元，報127.4元。港交所（00388）權益披露，主席馬化騰早於本月七日，在市場減持500萬股，每股作價102.7元，以填補證券借貸協議借出的等量股份。回顧當日，騰訊股價146.9元，遠高於主席申報的減持作價。值得留意的是，騰訊大跌亦始於當日，之後三個交易日，跌到126.9元，同高位相差足足廿蚊。
騰訊主席今次行動，或者有缸邊客會唔明實際操作，簡單啲講，馬化騰等同向街外發行認購股票權，以鎖定沽貨價達到分批減持股份的目的。美銀美林通訊指出，現時尚有2,048萬份合約，到期日介乎一○至一二年。
騰訊值博率一般
儘管股聖彼德林治講過，大股東減持未必百分百睇淡，而大牛市中，這類機會更往往會被基金視為入貨良機，增加持股比例，但基於現時市況麻麻哋，減持消息恐怕只會使股價波動性加劇，尤其最近唔少大孖沙質疑騰訊的網上遊戲玩家增長有放緩趨勢。姑勿論如何，基本因素考慮，騰訊向來派息偏低，能夠支撐股價的資產極少，股價跌完預期市盈率仲要接近二十六倍，騰訊將來業績增長的可容許出錯空間唔多，橫睇掂睇，值博率都係一般。
大家都係基金股，可是國藥（01099）表現卻截然不同。近兩個月股價雖然跟隨大市調整，由高位38.6元跌到最低見過26.1元，但在基金補倉盤支持下，近日已拾級回升，周二升1.4元，報31元，計落已經追番整個跌浪四成，論反彈動力，尤在大市及國指之上。
生老病死乃人生必經階段。國藥受到基金重視，基本上藥品屬老病者的半必需品，國家推行醫改方案，重列全國藥品目錄，行業深信規範化之後，藥品銷售會有顯著增加，在中國藥品及保健品分銷商及供應鏈服務手執牛耳的國藥，會是必然受惠者，即使貴一貴，基金經理都無辦法唔將這龍頭納入投資組合之內。
藉收購擴市佔率
純睇數字，毫無疑問國藥高不可攀，一○年市盈率是教人乍舌的46.5倍，但分析員要唱好亦大條道理，藥品銷售在內地屬高度分散行業，龍頭國藥市佔率得11%，目前市場估即使每年只升1%，但連同基本銷售增長，已足以令國藥交出至少兩至三成純利升幅，國藥上市後身體力行也做到這點，向母公司收購北京、新疆及湖北省藥品分銷網絡。
筆者認為，豪賭可免則免，但基於唔少基金想禁售期之後執平貨，結果事與願違，市況一穩就焗住高追，國藥短期要反彈上35至37元機會唔小。