今浪港股由23,000點插到19,000點不保，主要擔心「歐豬」危機。但睇番連日來西班牙及意大利十年國債的違約掉期（CDS）溢價不斷回落，分別由高位252點子及234點子，回到202點子及168點子水平，反映最大的不明朗因素已被掃除。其次，從技術走勢上，期指兩個月來首次連續三日企在20日線水平樓上，而且恒指也升穿19,900點阻力（小雙底量度升幅可見20,846點），超賣的港股，在假期前後，延續升勢的可能性十分之大。
愛股偉易達（00303）出成績表，全年賺2.065億美元，按年升44.2%；下半年比上半年都有26.8%增長，主要拜針對商業用戶的AT&T品牌電話產品暢銷所帶動。每股純利83.7美仙，意料之外仲係末期息高達62美仙（約4.836港元），較大行預測的41至45美仙高出一截，連埋中期息全年派78美仙，派息比率高達93%，現價80.4元，息率高見7.6厘，增長收息股，真係當之無愧。套用歷史市盈率十四倍左右，加埋搶高息買盤支持，睇嚟短期再上90元樓上機會唔細。
大手筆投資基建內房
紅籌老大哥上實（00363），最近於吹風會上披露公司的三年計劃，資本開支可能高達100億至200億元，投資會針對基建及房地產兩大方向。在通脹唔低、經濟持續有8%增長的中國，投資收費公路無論車流量及路費，基本上年年有一定增長，可是靠自然收入升幅，好難吸引大孖沙投資興趣，不斷向新基建項目投入資源，增加收入源頭提升吸引力，是司空見慣。反而中央近半年連環出手打擊炒樓，樓市開始吹淡風之際，強調要加強房地產投資，教人意外，管理層的「樓市不好時買地，樓市好時賣房子」言論，基本上同股市知易行難的格言：「高沽低買」，異曲同工，是管理層有股神級的自制能力，抑或意味着中央可能再度對樓市炒風解禁，史提芬認為後者可能性較大。
市盈率十倍唔算貴
上實股價今年以來累積跌兩成一，跑輸大市，一來市場近年對於這類綜合類股份興趣下降，二來去年房地產投資佔上實分部溢利四成八，追隨內房股跌幅，亦都合情合理。上實市值339億元，去年賺28.6億元，分析員估今年賺35.3億元，或者高估了，但在基建及內需消費投資支撐下，要達到30億元盈利應該唔難，十倍左右的估值，一啲都唔算貴，按管理層高沽低買言論，似乎刻下正是買貨而非盲目唱淡的時候。