地皮最後成交價貼近市場估計上限的109億元，相當於每方呎樓面地價1.254萬元，話好貴其實又唔算，以估得較樂觀的瑞信，拍地前估成交價去到110億，該行睇好的理由，包括何文田地皮係勾地表內九龍半島地勢最高住宅地皮（水平線上超過50米），擁全維港海景，鄰近環境唔錯，全屬低密度物業及政府運動場，港鐵（00066）何文田站又响附近，瑞信認為即使地價去到每呎1.4萬元，仲係比新世界（00017）嘅「名鑄」低一大截咁話。

地產股短線可睇好

姑勿論是樂觀抑或持平，今次賣地結果粉碎咗早前地產商聯手壓價的疑團，對近期因為九招十二式加埋「歐豬」危機，想入市又唔敢入市的買家來說，應該有刺激作用，尋日美聯（01200）午市升穿早前批股價5.9元，相信地產股短期有反彈條件。

尋日市場另一焦點，係前晚美國蘋果公司公布第四代iPhone手機。有趣的是，同日iPhone的OEM主要代工商富士康（02038），公布第二波加人工計劃，基本工資由900元人民幣加到1,200元人民幣之後，準備十月再加到2,000元人民幣，消息來得突然，大行擔心富士康薪酬成本上漲，紛紛調低業績預測，拖累股價跌3.2%或者0.18元，報5.48元。

加薪料獲客戶首肯

Steve Jobs畀iPhone迷當神咁拜，富士康就慘被冠上血汗工廠惡名，其實都幾冤枉，唔信睇番兩間公司業績，過去兩年毛利率，蘋果平均有37%，富士康只及六分一左右，得6.4%，考慮一個零售價一個批發價計，賣一部手機兩間公司分別賺到幾多錢，唔使畫公仔畫出腸。

富士康有工人60萬，簡單計數，每人加1,100元人工，一年要79.2億元人民幣，或者11.5億美元，等於公司○九年營業額72.1億美元的大約16%，利錢咁薄，唔使問阿貴都知道，無一班客戶首肯分攤成本，代工王根本無可能應付三級跳的加人工計劃。

話說回頭，富士康以生產成本低而出產品質高而馳名於世，像蘋果公司一類的電子消費品公司，要搵其他更平更可靠的供應商，根本唔容易，唇亡齒寒的關係，亦係加價到加人工可以瞬間落實的主因。

基於成本轉嫁需時，新措施肯定會拖低富士康今年業績，而點樣將整個供應鏈利潤重新分配，會是長遠一大考驗。睇番「十二連跳」的悲劇消息，使富士康股價在兩個月內時間跌掉三成六，現水平博反彈未嘗不可，況且從果斷的加薪行動所見，應該是管理層有把握把問題解決的先兆。