呢兩日落行坐，全場成朝冇幾多張枱有電話響，打嚟嘅都係問價居多，投資者入市意欲低迷，金魚缸水盡鵝飛，真正「六絕」。咁嘅環境，受害者當然係港交所（00388），短線反彈未能企穩120元樓上嘅話，有機會下試百元大關支持。
內房股跌咗咁耐，近日終於有大行唱好，大摩及高盛不約而同咁話，雖然內地樓價尚有下跌空間，但內房股股價已反映咗不明朗因素。
阿莊則認為，內房股經歷過去兩個月嘅跌勢之後，現時嘅估值已合理得多，但係咪已經見底就唔敢講，亦難以估計股價喺低位要整固幾耐，皆因祖國政策從來都冇得估。不過，若然閣下齋睇估值，覺得可以小試牛刀，穩陣起見，宜從實力內房股入手，首選依然係中國海外（00688）及華潤置地（01109）。
三網融合造就商機
三網融合成投資熱點，《互聯網白皮書》指內地使用手機上網嘅網民已達到2.3億人。顯然，當日後三網融合，一部機可以同時兼具手機、電視及電腦功能，這個新市場將造就龐大嘅商機。
由於呢項新政策涉及電訊、互聯網及廣電三大行業嘅利益，政策制訂過程中各方討價還價在所難免，據聞經過五次易稿後，三網融合嘅試點方案好可能喺短期內正式公布，相關股份可以多望兩眼。
講開呢類股，京信通信（02342）股份每手股數將於本月廿一日起由兩千股改為五百股，相信入場費下降有助刺激交投。
過去數年，受惠於產業榮景，京信盈利持續錄得高增長。以現價計，往績市盈率約18.9倍。隨着年內三網融合試點正式啟動，未來市場對於網絡優化嘅服務需求將現快速增長，京信主營業務前景樂觀，股價喺7.5至8元水平乃一強大支持區，重大阻力喺11元水平，9元樓下具留意價值。
戰報
天地數碼（00500）
戰報志強連中兩元，再於本周一貼中天地數碼，股價周一低位0.53元，昨日最高升至0.6元，升幅13.2%。
紫金礦業（02899）
錢進指紫金礦業受惠金價高企，本月七日推介低位5.32元，昨日隨金價升至高位5.6元，升5.2%。