上星期的環球小股災,始於美國五月就業數據,並無出現總統奧巴馬周中時預告的「超額完成」,一班好友有被騙感覺;其次,係匈牙利總理發言人突然提出警告,話有可能出現類似希臘嘅債務違約危機。自美國將次按毒債賣畀歐洲金融機構,財政唔妥嘅,何止「歐豬」五國同匈牙利政府?講到底,不過想趁亂向國基會(IMF)要求貸款,增加討價還價籌碼。
港股料離見底不遠
睇番今次主角匈牙利,本身唔屬於歐元區成員,筆者對當地經濟一頭霧水,但純睇數字,該國人口大約等於歐元區的五十分之一,GDP則大約係歐盟八十分之一,但卻令全球股市一日蒸發咗3%市值,令歐元兌美元穿1.2重要心理支持,係咪誇張咗,筆者的確咁諗,但見今日市場草木皆兵,任何壞消息都被淡友利用,做好友只能輕嘆一句「時不我與」。
睇番恐慌指數(VIX)上周五抽上35.48,同五月廿一日高位48.20仲有一大段距離,評定華爾街三大指數上周是借勢調整抑或一次熊市開始,看來仲係言之尚早,港股可能未見底,但筆者堅持離底不遠的預測。
盛傳已久嘅交行(03328)供股集資計劃終於落實,大概因為不明朗因素消除,交行股價尋日跌幅反而比三大國有銀行更細,跌0.06元報8.13元,貼近全日高位收市。
交行股東無理由唔供
今次交行A+H供股,供股按10供1.5基準,A股每股供4.5元人民幣,H股供5.14元,未計佣金及成本前集資總額330.71億元人民幣。毫無疑問,H股股東面對高達36%的折讓,無理由選擇唔供任由股權攤薄。而對於集資規模低過預期接近兩成,交行管理層也立即解畫,表明今次集資令核心資本充足比率增加1.6%,最少三年內交行有足夠核心資本金支撐業務發展,然則短期內不會再伸手集資。
交行股價今年累積跌9.8%,跌幅細過大市,對比三大國有銀行要協助國家推動某些金融政策,單打獨鬥的交行更能得到大孖沙的喜愛。由彭博資訊統計,37間為交行撰寫報告的投行中,只有3間唱淡,26間叫買入。在計及供股造成的攤薄效應前,交行一○年預期市盈率只得9.3倍,以四年來純利複合式年增長34.3%,未來兩年預期增長率29.7%及22%,單位數估值確實不可思議,或者唔少人擔心中央打擊樓市會令銀行壞帳率由低位回升,但筆者相信市場已過分悲觀,才令中資銀行估值如此低殘。