08/06/2010

播放本新聞相關短片
查詢股票編號

追星族:澳科逆市見突破

上周五華爾街大好友被大屠殺,港股一如預期低開,俗語話大淡好尾市,恒指埋單跌幅收窄到401點,但見唔少二三線股反彈力度麻麻,令唔少早市撈底的散戶,失望而回。

本來咁差市況一動不如一靜,最好離場純觀戰,不過,見到有隻基金愛股澳科(02300)走勢唔錯,特登同看官們分享一下。澳科係內地捲煙紙龍頭生產商,在全國市場佔有率達12%,內地每四個人就有一個煙民,煙民數目3.5億,乃全球煙民總數的三分之一,市場潛力巨大,儘管去年收購貴聯的交易擱置收場,但未令澳科對透過收購擴大市佔率的決心,希望未來幾年透過合併與煙草業本身的增長,擴大佔有率到兩成至兩成五。

去年澳科賺3.65億元,比○八年倒退21.8%,主要受撤回收購捲煙紙廠貴聯的影響,但舊有業務增長依然唔錯,大行估計一○年純利4.2億元,預期市盈率10.5倍,以一間增長前景唔錯的內需股而言,價錢一啲都唔貴。最後睇番走勢,早前宣布業績後,五月初抽升至5.8元,橫行調整悶足一個月,近期在4.5元獲支持,尋日初見突破,收報4.74元,隨時係第二輪升浪的開始。

澳科控股(02300)目標價:5.5元 止蝕價:4.5元

姚午齊