本文重點
返完一日工最好相約老友食吓飯，舒舒服服傾吓偈。致富證券資產管理部董事鄧澤堂放咗工都鍾意同三五知己「Fine dining」，周圍搵地方飲酒消遣。佢最近就同兩位圈中好友夾份，喺中環蘭桂坊開咗間餐廳。佢話，有咗個「私竇」，可以過吓「老闆癮」之餘，第日飲飲食食就方便得多，希望餐廳最快半年至一年後回到本。
圈中老友夾份開餐廳
啱啱榮升東主，日夜工作兩邊走，致富大老闆唔知有冇微言先？鄧澤堂講，原來致富證券董事總經理周松堦唔單只無責怪佢秘撈，仲身體力行支持佢。一直鍾意食中菜嘅周老闆，親自到餐廳試食西餐之餘，而且對樓面裝修和燈光設計等畀足意見，仲問佢使唔使幫手擇開張吉日，周老闆對待員工就真係無微不至。
其實，鄧澤堂平時做嘢咁有效率，加上餐廳有另外兩位老細，大家可以輪流夜晚睇舖，所以周老闆都好放心，唔怕佢「秘撈」。