本文重點
恒指尋日反彈逾三百點，以收市指數計，不單止成功收復10日線阻力，仲係接近三星期嘅高位，技術走勢明顯改善，唔少先前被基金沽得兇殘的醫藥及消費股，首先享受到補倉買盤的威力，好似聯邦制藥（03933），勁升0.8元，報10元。唔講唔知，係歷史上第二最高收市價。睇番聯邦股價，由四月中開始於8至10元之間上上落落，今次突破主要橫行區，量度目標至少見12元，值得留意。
毛利率有望改善
無巧不成話。大摩尋日出報告唱好，指公司在改善產品生產成本結構之後，毛利率有望改善，且產品價格正穩定向上，將目標價由7.5元大幅調高到12元。睇番過去三年，聯邦業績曾經由○七年賺5.1億元跌到○八年的4.3億元，舊年反彈上5.4億元，估計今年在高毛利的胰島素產品帶動下，可以增長四至五成，預期市盈率14.5倍左右，藥業股中估值都算吸引，加埋股價作勢破位，後市可以睇高一線，短炒睇12元。若市況配合，中長線升到13.5至14元都唔出奇。
聯邦制藥（03933）目標價：12.0元 止蝕價：9.2元