港股插水非因數據

大市腳軟，唔多唔少同內地房產稅短期出籠，以及中國五月份製造業採購經理指數（PMI）令人失望有關。中國物流與採購聯合會發布，上個月PMI滑落1.8去到53.9，差過經濟師預測最低的54.5，美銀美林提出，中國公布PMI以來，四月到五月數據是跌多升少，認為今次只屬季節性調整，數據並非市場認為般疲弱。

再者，考慮到期內中央落重藥冷卻樓市，以及歐洲爆出債務危機，五月份PMI仍然高於50，其實表現已經算唔錯，皆因數字高於50，代表製造業仲係擴張當中，中港股市因此跌超過1%，似乎說不過去，看來港股只係跌定先，主要係擔心尋晚美股長周末假期後重開，會有插水情況。

近期最忙嘅，相信係石油石化股分析員，資源稅之後，發改委日前調低汽柴油價格每噸分別降低230元和220元（人民幣．下同），但國產陸上天然氣出廠基準價格，則從舊有價格計大幅提升25%，至每立方米增加0.23元。

加氣價暗示通脹受控

基於近期國際油價從五月初每桶87美元，直落式插水去到65美元，近兩日才彈番去72美元水平，石化產品價格跟隨調整，基本上在市場預期內，反而天然氣價一次過提價四分一之多，就較令人感到意外，有陰謀論者認為，發改委選在此時此刻大手加氣價，或多或少反映決策部門有信心下半年內地CPI可以由高位回落，唔怕因此掀動通脹死穴。

基於油價降價在市場預期之內，環顧大行報告顯示，今次大致對中石油（00857）、中石化（00386）業績影響1至2%，不致令股份評級及估值有太大的變動。

龍頭股中石油自中央開徵暴利稅後，失去了不少昔日光芒，因為油價漲升對業績刺激作用大打折扣，股神巴菲特也因此離她而去。從估值所見，難以想像中石油淪落到如斯田地，綜合大行預測一○年盈利1,368億元，市盈率9.9倍，預計息率4.35厘，單計收息比美債仲要高。

雖然國際油價即使再升到80甚至100美元一桶，中石油未必太能夠受惠，筆者也不相信中國政府三至五年內會取消徵收暴利稅，不過，大家不能忽視一個有13億人口，經濟以每年8%增長速度成長的國家，對石化產品需求的驚人升幅，即使有暴利稅，只要中下游業務規模擴大，營運效益更佳，要業績達成1,300億至1,600億元的「合理期望」，難度唔大。